பூத்தையல்: பூத்தையலில் வார்லி

சுந்தரி இராமநாதன் அவர்களின் தங்கை மகளான ப்ரியா சில தினங்களாக தொடர்பில் இருந்து வருகிறார். இணைய கலந்துரையாடலின் போது பல புது விஷயங்களை சொன்னார். மண்டலா கருத்தாக்கம் பற்றி விரிவாக எடுத்துரைத்தார். அவர் கூறிய செய்தி எனக்கு புதிதாக இருந்ததாலும், நமது இந்திய பாரம்பரியத்தோடு தொடர்புடைய செய்தி என்பதாலும் மண்டலா கருத்தாக்கத்தைப் பற்றி மேலும் தெரிந்து கொள்ள வேண்டும் என்ற ஆவல் ஏற்பட்டது. இணையத்தில் தேடியதில் சில தகவல்கள் கிடைத்தன.

இது ஆன்மாவை நெறிப்படுத்தும் கலை. குறிப்பிட்ட வகையான ஓவியத்தின் வழியாக உள்ளத்தை நெறிப்படுத்தும் கலை. சுருங்க சொன்னால் இது ஒரு வகையான தியானத்தைப் போன்றது! மண்டலா முறைப் பற்றிய விழிப்புணர்வு சில மேற்கத்திய நாடுகளில் அதிகம் இருப்பதாகவும், அதை அவர்கள் வியாபார நோக்கோடு செயல்படுத்துவதாகவும் ப்ரியா வருத்தப்பட்டார். அடுத்த வாரம் தன்னுடைய சித்தியின் பிறந்தநாள் வருவதால்,பிறந்தநாள் பரிசாக அழகான பூவேலைப்பாடுடன் கூடிய பொருள் ஏதாவது கொடுக்க விருப்பப்படுவதாக சொன்னார். படுக்கை விரிப்பில் பூத்தையல் செய்து கொடுக்கலாம் என்று முடிவு செய்தோம்.

ப்ரியாவின் தேவைகளை குறித்து கொண்டு கோ-ஆப்டெக்சில் படுக்கை விரிப்பையும், ரெங்கநாதன் தெருவில் பூவேலைக்கு தேவையான நூல்களையும் வாங்கினேன். நமது கலாச்சாரம்,தியானம் போன்றவற்றில் ப்ரியாவின் ஈடுபாட்டை நினைவில் கொண்டு அதற்கு தகுந்தாற் போல் வடிவ படிமம் தயார் செய்ய வேண்டும் என்று முடிவு செய்தேன். ஆதிவாசிகள் கை கோர்த்துக் கொண்டு நிற்பது போன்றும், அவர்களுக்கு நடுவே வட்ட வடிவ படிமத்தில் குறுக்கும் நெடுக்குமாக இரண்டு திசைகளிலிருந்து வரும் கோடுகள் நடுப் புள்ளியில் சந்திப்பது போலவும் வடிவ படிமம் தயார் செய்யப்பட்டது.

வட்ட வடிவம் பூமியை குறிக்கிறது. அதற்குள் இருக்கும் எதிர் எதிர் திசையிலான கோடுகள் மனிதர்களிடையே இருக்கும் மொழி,கலாச்சாரம்,நிறம் போன்ற வேற்றுமைகளை குறிக்கவும்,மனித உருவங்கள் கை கோர்த்து கொண்டு இருப்பது ஒற்றுமையின் அவசியத்தை உணர்த்தும் விதமாகவும் வரையப்பட்டது.